ටෙලිග්‍රෑම් හි ඩිජිටල් පසුම්බිය ඇමරිකාවට

ලොව පුරා බිලියනයකට ආසන්න පරිශීලකයින් සිටින ටෙලිග්‍රෑම්, එක්සත් ජනපදයේ මිලියන 87ක පරිශීලකයින් වෙනුවෙන් ඔවුන්ගේම ඩිජිටල් මුදල් පසුම්බියක් (TON Wallet) හඳුන්වා දුන්නා. මෙම නව සේවාව, ජනපදයේ ප්‍රධාන සමාජ මාධ්‍ය වේදිකාවක ඒකාබද්ධ කළ පළමු ස්වයං-භාරකාර (self-custodial) ඩිජිටල් මුදල් පසුම්බිය ලෙස ඉතිහාසයට එක් වෙනවා.

ඩිජිටල් මුදල් එකතු කිරීමේ නව පහසුව

TON Wallet හරහා, බිට්කොයින්, එතිරියම්, සොලානා, සහ ටොන්කොයින් (Toncoin) වැනි ඩිජිටල් මුදල් ටෙලිග්‍රෑම් යෙදුම තුළම යැවීමට, ලබා ගැනීමට, හා ගබඩා කිරීමට හැකියි. වෙනත් යෙදුම් හෝ බ්‍රවුසර් එක්ස්ටෙන්ෂන් බාගත කිරීමකින් තොරව, ටෙලිග්‍රෑම් හි සරල චැට් ඉන්ටර්ෆේස් එක හරහා මෙය කළ හැකි බව විශේෂත්වයක්. Apple Pay, Google Pay, හෝ බැංකු කාඩ් හරහා MoonPay සමඟ එක්ව ගාස්තු රහිතව ඩිජිටල් මුදල් මිලදී ගත හැකි අතර, බැංකු කාඩ්වලට මුදල් ආපසු ලබා ගැනීමේ (off-ramp) පහසුකමත් මෙහි ඇත.

“අපි ඩිජිටල් මුදල් ටෙලිග්‍රෑම් තුළම ඒකාබද්ධ කළා. එය එකතු කළ යෙදුමක් නොවෙයි, එය ඔබ දැනටමත් භාවිතා කරන සන්නිවේදනයේ කොටසක්,” යනුවෙන් The Open Platform (TOP) හි ප්‍රධාන විධායක නිලධාරී ඇන්ඩ්‍රූ රෝගෝසව් පවසනවා. “ඩිජිටල් මුදල් යැවීම, පණිවිඩයක් යවනවා වගේ ලේසියි!”

එක්සත් ජනපදයට පැමිණීමේ බාධා

TON Wallet, රුසියාව, ආසියාව, හා යුරෝපයේ පරිශීලකයින්ට වසර දෙකකට ආසන්න කාලයක් ලබා ගත හැකි වුවත්, එක්සත් ජනපදයේ නීතිමය බාධා හේතුවෙන් මෙතෙක් එහි හඳුන්වාදීම ප්‍රමාද වුණා. 2024 දී ලොව පුරා මිලියන 100කට වඩා පරිශීලකයින් මෙම පසුම්බිය සක්‍රිය කළ අතර, එය ටෙලිග්‍රෑම් හි බිලියනයක පරිශීලකයින්ගෙන් 10%ක් පමණ වෙනවා. 

TON Wallet හි ප්‍රධාන සංවර්ධකයා වන The Open Platform (TOP), Ribbit Capital හි නායකත්වයෙන් ඩොලර් මිලියන 28.5ක ආයෝජන වටයකින් යුනිකෝන් තත්ත්වයට (බිලියන ඩොලර් 1ක වටිනාකම) පත්වුණා. Pantera Capital ඇතුළු ඩිජිටල් මුදල් ආයෝජන සමාගම්ද මෙයට එක්ව තිබෙනවා. මෙම ආයෝජන, එක්සත් ජනපදය හා යුරෝපයේ ව්‍යාප්තියට හා නීතිමය රාමුවන්ට අනුකූල වීමට උපකාරී වනවා.

TON හි ගමන

TON (The Open Network) බ්ලොක්චේන්, 2018 දී ටෙලිග්‍රෑම් හි නිර්මාතෘ නිකොලායි ඩුරොව් විසින් ආරම්භ කළ නමුත්, 2020 දී එක්සත් ජනපද SEC රෙගුලාසි හේතුවෙන් ටෙලිග්‍රෑම් එයින් ඉවත් වුණා. පසුව, TON Foundation හරහා එය විවෘත මූලාශ්‍ර ව්‍යාපෘතියක් ලෙස දිගටම සංවර්ධනය වුණා. අද වන විට, TON දිනකට ගනුදෙනු මිලියන 5.5කට වඩා හසුරවන අතර, ස්මාර්ට් කොන්ට්‍රැක්ට් මිලියන 34කට වඩා ඇති බවත්, TON DNS හා TON Storage වැනි නව්‍ය සේවාවන් ලබා දෙන බවත් පැවසෙනවා.

ශ්‍රී ලංකාවට බලපෑම?

ශ්‍රී ලංකාවේ ඩිජිටල් මුදල් භාවිතය තවමත් ආරම්භක අදියරේ තිබුණත්, ටෙලිග්‍රෑම් හි මෙම නව පසුම්බිය, තරුණ ව්‍යවසායකයින්ට හා ඩිජිටල් ආර්ථිකයට එක්වීමට ආකර්ශනීය අවස්ථාවක්. නමුත්, මෑතකදී ශ්‍රී ලංකාව PayPal හා Stripe වැනි සේවාවලට 18% VAT බද්දක් ගැසීමට සැලසුම් කරන බව පැවසුවා. එමඟින් ටෙලිග්‍රෑම් හි TON Wallet හරහා ගනුදෙනු කිරීමේදීද බදු බරක් එකතු විය හැකියි. මෙය ශ්‍රී ලාංකික පරිශීලකයින්ට අමතර වියදමක් එකතු කළ හැකි බව විශ්ලේෂකයෝ පෙන්වා දෙනවා.